Әбу Ханифа медресе колледжі республикалық конференцияға қатысты

Астанада өткен «Тектілік – асыл қасиетіміз» атты республикалық конференцияға Әбу Ханифа медресе колледжінің ұстаздары мен студенттері онлайн түрде қатысты. Қазақстан мұсылмандары діни басқармасы ұйымдастырған бұл шара «Ислам және дәстүр құндылығы» жылының қорытынды жиыны ретінде ерекше маңызға ие болды. Конференция барысында тектілік ұғымының қазақтың рухани-мәдени өміріндегі орны мен шариғаттағы мәні кеңінен талқыланды. Бас мүфти Наурызбай қажы Тағанұлы өз сөзінде тектіліктің табиғат, тәрбие және қоршаған орта арқылы қалыптасатын асыл қасиет екенін атап өтті. Ол тектілікті адамгершілік, ұят, әділдік, ар-намыс, ақыл-парасат пен білімділіктің үйлесімді көрінісі ретінде сипаттады. «Ислам және дәстүр құндылығы» жылы аясында өткен жылдың қорытынды жиынына ҚМДБ Төрағасы, Бас мүфти Наурызбай қажы Тағанұлы, Парламент Сенатының депутаты Нұртөре Жүсіпов, Дін істері комитетінің төрағасы Ержан Нұкежанов, ғалым, профессор Серік Негимов, Ұлттық құрылтай мүшесі, биология ғылымдарының докторы, профессор Күнсұлу Дальтонқызы, ғылым докторы Мақсат Сқақов және зиялы қауым өкілдері, қоғам белсенділері мен имамдар, дін қызметкерлері қатысты. Әбу Ханифа медресе колледжінің ұстаздары мен студенттері онлайн қатысу арқылы конференцияның негізгі мазмұнын тыңдап, қоғамдағы тектілік ұғымының рөлін түсінуге үлес қосты. Бұл қатысу олар үшін рухани әрі ғылыми
 тұрғыда маңызды тәжірибе болды. Мұндай шаралар жастардың ұлттық және діни құндылықтарға деген көзқарасын қалыптастыруда, тектіліктің заманауи қоғамдағы маңызын түсіндіруде үлкен рөл атқарады.